जळगाव :- जळगाव शहरातील पिंप्राळा हुडको परिसरात झालेल्या जुन्यावादातून घरातील कुटुंबावर चॉपर आणि कोयताने प्राणघातक हल्ला केल्याची धक्कादायक घटना रविवारी १९ जानेवारी रोजी सकाळी १० वाजता घडली. या प्राणघातक हल्ल्यात एका तरुणाचा मृत्यू झाला. या घटनेमुळे परिसरामध्ये खळबळ उडाली आहे. तर जखमी झालेल्या पाच जणांना जिल्हा शासकीय वैद्यकीय महाविद्यालयात उपचारासाठी दाखल करण्यात आले आहे. मुकेश रमेश शिरसाठ ( वय २६, रा. पिंप्राळा हुडको, जळगाव ) असे मयत झालेल्या तरुणाचे नाव आहे.
या संदर्भात अधिक माहिती अशी कि, जळगाव शहरातील पिंप्राळा हुडको परिसरामध्ये राहणाऱ्या शिरसाठ कुटुंबावर जुन्या वादातून सात ते आठ जणांनी चॉपर,कोयता, चाकू आणि लाकडी काठी या वस्तूंनी जीवघेणा हल्ला करण्यात आला. या हल्ल्यामध्ये नीलकंठ सुखदेव शिरसाठ, वय ४५, कोमल नीलकंठ शिरसाठ वय २०, नीलकंठ शिरसाठ वय २५, ललिता नीलकंठ शिरसाठ वय ३०, मुकेश रमेश शिरसाठ वय २६, आणि सनी नीलकंठ शिरसाठ वय २१, सर्व रा. पिंप्राळा हुडको, जळगाव हे गंभीर जखमी झाले. त्यांना तातडीने जिल्हा शासकीय वैद्यकीय महाविद्यालयात दाखल करण्यात आले आहे. यातील मुकेश रमेश शिरसाठ वय-२६ या तरुणाचा उपचारादरम्यान मृत्यू झाला. त्यामुळे जिल्हा शासकीय वैद्यकीय महाविद्यालयात त्याच्या नातेवाईकांनी एकच आक्रोश केला आहे.
यावेळी महाविद्यालयात मित्र परिवारासह नातेवाईकांची मोठ्या संख्येने गर्दी पाहायला मिळाली. हि घटना घडल्यावर रामानंदनगर पोलिस ठाण्याचे पोलिस कर्मचारी जळगाव स्थानिक गुन्हे शाखेचे वरिष्ठ पोलिस निरीक्षक बबन आव्हाड, यांच्यासह पथकाने घटनास्थळी धाव घेतली. तसेच जिल्हा रुग्णालयात पोलिसांचा तगडा बंदोबस्त ठेवण्यात आला आहे. दरम्यान या घटनेबाबत रामानंदनगर पोलिस ठाण्यात गुन्हा दाखल करण्याचे काम सुरु आहे.
Leave a Reply